spot_img

विद्रोहको औचित्य पुष्टि नभएकाले पुरानै घरमा फर्किए: चापागाईं

असोज ०५ बुटवल, प्रेस चौतारी नेपालका पुर्व केन्द्रीय अध्यक्ष बालकृष्ण चापागाईंले विद्रोहको औचित्य पुष्टि नभएकाले आफू पुरानै घर एमालेमा फर्किएको बताएका छन् । नेकपा एकीकृत समाजवादीको केन्द्रीय सदस्य तथा अर्थ एवं योजना विभागको प्रमुख रहेका चापागाईंले हालै मात्रै सो पार्टी परित्याग गरी एमालेमा फर्किएका थिए ।

प्रेस चौतारी नेपाल रुपन्देहीको जिल्ला कमिटीको बैठकलाई बुधबार संबोधन गर्दै उनले भने–“जुन उद्देश्यले समाजवादी पार्टी स्थापना भएको थियो, त्यसको औचित्य पुष्टि हुन सकेन, त्यसकारण म पुरानै घर फर्किएको हुँ ।”

नेकपा एकीकृत समाजवादीमा बसेर काँग्रेसको कार्यकर्ता बन्नु बाहेक अरु उपाय नदेखेपछि आफू पुरानै मातृ पार्टीमा फर्किएको बताए । “सत्तारुढ गठबन्धनमा बस्नु भनेको काँग्रेसको कार्यकतर्ता बन्नु हो, त्यो बाहेक अरु केही हुन सक्दैन, काँग्रेसको कार्यकर्ता बन्नु भन्दा मैले बरु पुरानै पार्टीमा पवर्किनु उचित ठानें”–उनले भने ।

चापागाईंले एमालेबाट विद्रोह गरेर नयाँ प्रकारको राजनीतिक अभ्यास सुरु गर्न खोजेर समाजवादी गठन गरेको भएपनि त्यसले कुनै परिणाम दिन नसकेको भन्दै बरु एमाले नै देशको सच्चा कम्युनिष्ट भएको र यसले मात्रै मुलुकलाई निकास दिन सक्ने बताए । “मैले करिव एक वर्ष बाटो बिराएकै हुँ, तर बिगतलाई बिर्सेर म इमान्दारिपुर्वक फर्किएको छ र बाँकी जीवन एमालेमै रहेर बिताउँछु”–उनले भने । उनले आफूले योगदान गरेको प्रेस चौतारीसँग केही समय टाढा रहेपनि छोटो समयले फेरि एकैठाउँ फर्काएको पनि बताए । उनले समाजवादीमा लागेका अन्य थुप्रै नेताहरु पुरनौ पार्टीमा फर्किने पनि बताए ।

बैठकमा प्रेस चौतारीका केन्द्रीय सचिव प्रदिप आचार्य, केन्द्रीय सदस्य तथा रुपन्देही इन्चार्ज अमृत गिरी, केन्द्रीय सदस्यद्वय नवराज कुँवर, अमृता अनमोल, सल्लाहकारद्वय शेरबहादुर केसी ,दिनेश पाण्डे, प्रदेश महासचिव निरु गौतम, प्रचार विभाग रुपन्देहीका सचिव नरेश केसी लगायतले पनि संबोधन गरेका थिए ।

बैठकले आउँदै गरेको विजया दशमी, शुभ दिपावलि, छठ एवं नेपाल संवतका अवसरमा शुभकामना आदान प्रदान एवं चियापान कार्यक्रम आयोजना गर्ने निर्णय गरेको संगठनका अध्यक्ष लक्ष्मण पौडेलले जानकारी दिए ।

प्रतिक्रिया दिनुहोस

सम्बन्धित खबर